Dyma gartref CAMAMAZON, prosiect ymchwil rhyngddisgyblaethol rhyngwladol dros ddwy flynedd wedi’i ariannu gan yr Academi Brydeinig, dan faner y cynllun Cymorth Datblygu Swyddogol. Yn y prosiect hwn, rydym yn dilyn llywyddiaeth Brasil ar gynhadledd COP30 yn ninas Belém. Mae COP30 yn dod â’r trafodaethau hinsawdd i Goedwig Law yr Amazon, sy’n rhoi cyfle unigryw i’r prosiect gofnodi sut mae’r goedwig yn cael ei defnyddio mewn strategaethau gwleidyddol lleol, cenedlaethol a rhyngwladol i lunio’r ymateb cyffredin. Byddwn yn defnyddio’r ddirnadaeth sy’n cael ei meithrin drwy’r gwaith ymchwil hwn i gynnig cysyniad newydd o gysylltiadau rhyngwladol sy’n canolbwyntio ar wleidyddiaeth hinsawdd yn y goedwig ac yn deillio ohoni.
Mae CAMAMAZON yn cynnwys tîm o chwe ymchwilydd a phartneriaid o blith pobl ifanc, pobl Frodorol, gwyddonwyr a llywodraeth ym Mrasil ac Ewrop. Mae’r prosiect yn sefydlu cydweithio rhwng Adran Gwleidyddiaeth Ryngwladol Prifysgol Aberystwyth yng Nghymru a chanolfan uwchefrydiau’r Amazon (NAEA) ym Mhrifysgol Pará, Belém, Brasil. Mae hefyd
wedi sbarduno partneriaethau gyda’r Adran Cysylltiadau Rhyngwladol ym Mhrifysgol Ffederal Rio Grande do Sul a Phrifysgol Brasília.
Byddwn yn defnyddio’r wefan hon a’r blog i gofnodi gweithgareddau’r prosiect ac i ddarparu adnoddau i fyfyrwyr, athrawon ac ymgyrchwyr allu dilyn a chymryd rhan yn COP30. Gallwch hefyd gael newyddion a diweddariadau rheolaidd ar BlueSky ac Instagram. Yn ein neges nesaf, byddaf yn sôn am ein gweithdy cyntaf yn ninas Belém ym mis Awst 2024, a gynhaliwyd gan ganolfan uwchefrydiau’r Amazon (NAEA) ym Mhrifysgol Pará. Tan y tro nesaf felly…